عن بعض ماينشر من غث الشعر.. وفي الحث على الانتقاء كتب الشاعر مشعل بن شباب العتيبي هذه القصيدة المعبرة: ياجزيل الشعر جاوب لازهمتك لاتحايد قل نعم للي ينادي ياجزيل الشعر قل له ودنا نقطف ثمرك اللي زها خضر الجرايد ودنا نسقي كبود من ظماها مضمحله ياشعر لاتبخل بجودك على من جاك رايد اعطني من بعض جودك ما الزمك بالجود كله في بحورك ماسبحنا كود لجزال القصايد والهزيل من القصايد نرفضه دقه وجله شاعرٍ بنات فكره ماتجي له بالفرايد احسن ينوخ ركابه عن طريق ماتدله كم نشوف وكم سمعنا كم قرينا في الجرايد هرج يلبس لباس الشعر تنشره المجله شاعر ماينبني شعره على جلب الفوايد وش محل الشعر يوم انه يقول وش محله مايحصل من وراه الا تشراه ونقايد يمكن يقال اشرب الماء بعد شعرك ماتبله للشعر عقد فريد ينظم نظم القلايد لو بغى شخص يفله ما استطاع انه يفله والمشاعر ماتحرك كود في وقت الشدايد لاشتعل نار الحشاء منها وفارت فور دله وانتثر قدمك جواهر اختر ونق الشرايد لين عقدك لانظمته مايجي لك فيه خله واترك وخل وتباعد وابتعد عن الزهايد خل عنك الطامن من الشعر والهزلان خله والمشاعر موج بحر في الحشاء يحتاج قايد يغترف منه الفريد ومن سماء فكره يزله لارعد سحاب فكره جت لك مزونه تهايد يشرب الظامي عطش منها وماها مايمله والشعر لو ينشدونه قال محتاج لضمايد ابتلاني بعض ناس مالهم في الشعر مله القوافي وزنها للمستمع ناقص وزايد والمعاني هابطه والوضع يبغى من يحله مثل مانبدى نختم القاف ماني بمتحايد قل نعم للي ينادي ياجزيل الشعر قل له
