هلا بسلطان

عزيز الملك ينهى النفس ووقت يامرها
يقول الشاعر اللي من هجوسه يبدع الحانه
بعد ما طاب له كيفه بيوت الشعر صخرها
يبي يعبر عن شعوره وعن شيٍ بوجدانه
وعن ربعه هل الزلفي يعبِّر عن مشاعرها
بداية قولي أرحب بامير الخير واخوانه
آبو نايف اردد له تراحيبي واكررها
هلا بسلطان يوم أقبل ارحب به وضيفانه
عدد ما لاح براق المزون وهل ماطرها
لمع بقدومه البارق وقامت ترعد امزانه
وهل الخير يوم انه لفى للدار زايرها
وفياض الزلفي اختالت بثوب تجذب ألوانه
وبقدومه يفوح الورد والديرة يعطرها
هلا ترحب بك رجالٍ لشوفك دوم ولهانه
تراحيبٍ يا بونايف تراي ازريت اعبرها
هلا باللي ظهر جوده وجوده ورث جدانه
رجالٍ هم هل الشيمة بماضيها وحاضرها
بمدح الشهم ابو نايف بيوت الشعر طربانه
وهو يستاهل بيوت القصيد اللي نسطرها
عطوفٍ يمسح الدمعة عن اللي زادت أحزانه
يزيل بعطفه هموم الضعوف اللي تكدرها
كريمٍ دايم ضيوفه تزاحم وسط ديوانه
طليق حجاج لضيوفه لجل تسمح خواطرها
والامنه عطى يعطي لوجه الله سبحانه
عطاياه الكثيرة بالخفا ماهوب يظهرها
عسى عودٍ يابونايف ذخرك بعالي جنانه
ولامات الذي خلف لنا رجالٍ نقدرها
بعد هذا )وعز الخيل( والحفله على شانه
له المجد وبطولاتٍ لزوم اليوم نذكرها
هو الأول إلا منه تراعد وسط ميدانه
وجميع الخيل لاجت بعد عز الخيل نعذرها
تجي عقبه جميع الخيل عرقانه وتعبانه
ولا يمكن تجي قبله ولو تتعب حوافرها
سريعٍ يشبه لسهمٍ توجه صوب نيشانه
يروم المركز الأول وغاياته يدورها
وعلشان ان له ماضٍ مجيد وصعب نسيانه
ابو نايف جعل له كاس والحزة يقررها
يا عز الخيل لك كاسٍ عليه الخيل شفقانه
لجل كاسك يميزها ويعليها ويشهرها
وكاسك منوة الخيال يوم يدرب حصانه
ومنوة من عسف خيله لاجل كاسك وضمرها
لك المجد ولك التاريخ شرع كل بيبانه
وصرت اسطورةٍ تذكر وكل الناس تخبرها
ويعيش اصطبلنا الأزرق لنا ويعيش سلطانه
عسى ربي يحقق له من الأمجاد وافرها
الا يااصطبلنا الأزرق ترى سمعتك رنانة
خماسيه بطولاتك وغيرك ما تصوّرَها
ويدوم اصطبلنا الأزرق وعز الخيل عنوانه
وجهود مهندس الانتاج ياهل العرف نشكرها
ورب الكون وامرنا نربطها لعدوانه
لجل ذلك ندربها وتعجبنا مناظرها
وصلاة الله ورحماته وتسليمه ورضوانه
على سيد ولد آدم وصادقها وطاهرها
الشاعر /عطا الله بن سليمان العطا الله
محافظة الزلفي