يا علام الأحوال

يا الله تجزا الشدايد خير ياعلاّم الاحوال
حيث الشدايد تبين لي عدوي من صديقي
وين الصديق الوفي اللي اليامن الزمن مال
يفزع بسرعة لنا ويشيل عثرات الطريقي
اللي الياهب نسناس الشدايد جاك بالحال
من يوم يقبل تشوف الود بعيونه حقيقي
صديق صادق ابوده لك صدوق الوعد رجال
يبغالك الخير والدنيا بقربه ما تضيقي
ما هوب يشرى لو انه يشترى نشريه بالمال
اشريه انا بالذهب واقول ياليته شقيقي
واحذر من اللي الياشفته تَحَسبه طيب الفال
يقول خذ راحتك والسّر في بيرٍ عميقي
يضحك ابوجهك وهو لك في ضمير الشر يحتال
يخدعك بلسانه الحالي وهو لك ما يطيقي
مثل الحنش ملمسه ناعم وفيه السم قتّال
يعجِبك والموت يسري داخل الجسم الرقيقي
مثل الغصن وين ما هب الهوى تلقاه ميّال
ما له مباري وتلقى كل يومٍ له رفيقي
ابعد عَنِه لا يغرك لو حكى معسول الاقوال
لو كان يلمع مثل لون الذهب يبرق بريقي