في أمان الله

قضى صبر المولع وانتحابه حظه المقرود
صدر حكم الموده والغرام العف واستاقه
ورد حوض المنايا واقتفاه العج والبارود
وغدا في لجة زادت عذاب البعد وارهاقه
تعلق بالأمل واحلام عمره كبلت بقيود
بقا في رحمة اللي له سيول الشوق دفاقه
الا يا أول غلا وآخر غلا وش حيلة المضهود
ياكود معانق الذكرى خيال ذاب فاوراقه
يراجع ذكريات امسه يدور كنزه المفقود
على سكة سراب الحظ يطرد والزمن عاقه
فمان الله ودعتك وداع العاشق الملهود
فمان الله روحي معك كل الروح منساقه
فمان الله ياعشب زهوره داعبتها النود
عسى وجه الكريم يباعدك عن كل بواقه
عسى كل الدروب اللي نويتيها تصير سهود
وعسى الله مايحملني فراقك فوق ما اطاقه
يموتن الاماني عند بابٍ للرجا مسدود
ويغتال الحزن لحظة فرح فعيون مشتاقه
لك الله مايخلد فالقلوب إلا غضيض العود
لو إنه راح تبقى ذكرياته عند عشاقه