السؤال الحائر

وغابت عن حياة اللي يسمونه هله مقرود
ثلاث شهور ما يدري وش الأسباب بغيابه
وغابت والحزن سوا بحاله شي مو معهود
سوات الريح لاهبت مع النيران في غابه
سواتٍ صرّمت فيه الحشى تصريمة العنقود
سواتٍ شيّبت من كودها الشعرات باهدابه
سواتٍ خلت الأيام في عينه ليالي سود
يبات ودمعة عيونه على خده ويصحا به
كأنه من توفى له بعد يأس الضنى مولود
بعد ما جهّز الافراح والألعاب وثيابه
من اللي حل ذبحه وأشعل النيران بالبارود
من اللي قاد عمره للهلاك بغيبة أحبابه
من اللي حدها ترحل ولا قالت متى بتعود
ولا حتى رسالة تجبر الخاطر ويهنا به
من اللي قد حملها للغياب وذبحة الملهود
وهي من بد خلق الله تعرف الحال وادرابه
سؤال وما لقى في صفحة التأويل أي ردود
ولا في صفحة الأعذار تبريرات لغيابه