لا تسألوني

زحمة شعور ولخبطة بال وظنون
تآكل من الضيقة يدين الكفاية
كم للأمل في رمل الأحزان مدفون
وسيلتي فكري والأوجاع غاية!
كلي تسنبلت بيدك.. خذني بهون
جيت استريحك.. لا تجدد عنايه!
ما عاد باقي للبكا فيني جفون
ذبلت سنيني والهوى بحّ نايه
متناثرة.. حلمي فقط إني آكون
بسمة رضا تحكي شفاتك.. رواية!
يا إنت مدري يا أنا عقل مجنون
من رتّلك في آخر الليل آية؟
من صبني في كاسة الجرح ليمون؟
أو من رسم وجهي حزن بالمراية؟
من مد غصني للشتا وانصرف دون
ما يجمع أوراق الخريف الحكاية؟
كذا تركني ضيم وإحساس مغبون
عجزت لا استر ضيقتي بالعباية!
تعبت أقدّر ناس ما يستحقون
وإن جيت.. مدري.. بس بي عقل تايه!
يا ضيق بالي يا السهر.. بس.. تكفون
خلوني ارمي ضيق صدري ورايه
صبري نفذ ما عاد بي قوة متون
ما عاد بي حيل أنتطر للنهاية
لا تسألوني ليه أو كيف.. وشلون؟
كل الحكاية: ما فهمت الحكاية!