بين روحي وبيني

يا غربتي..يا غربتي سامحيني
وتجملي بي خطوة الدرب طالت
انا رهينة ما مضى من سنيني
رغم الظروف اللي عليّه توالت
أصبر...وتشعل ذكرياتي حنيني
لو دون حلمي سود الأيام حالت
والدرّه اللي حبها محتويني
قلبي يميل لدربها وين مالت
يبقى غلاها بين روحي وبيني
ماهي مجرد غايةٍ واستحالت
لو غربتي رمزٍ كتب في جبيني
من غيرها بالروح صالت وجالت؟!
عمر الشقا اللي خطوته تحتريني
اليا ذكرته دمعة العين سالت
واليا عزف جرح اغترابي ونيني
غنيّت...كم نفسي من الحزن شالت؟
وبكى خفوقي دمع من دم عيني
وعبرة شقى ما يوم والله زالت
المعذره يا غربتي...واعذريني
وتجملي لو خطوة الدرب طالت