تكفين.. لا تتركيني

الحين جيتي تسأليني عن الحال
كم قلت لك.. تكفين لاتتركيني
جرحي تحملته.. وتدرين كم طال
من بعد (خمس سنين) جيتي تبيني
وش هالمحبه.. كيف جيتك على البال
من بعد ماطحتي... ولا أنتي بعيني
أنتي بعيني دمع.. لكن ترى سال
وأحلف لك إني ماسحه في يديني
ماهي محبه.. (يامها).. لا، غربال
من هو يرجّع (يامها) لي سنيني
إنتي؟؟ أو الأيام؟؟؟ والعطر والشال
اللي إلين اليوم ذكرى تجيني
وإلا هو أول حرف باسمك بسلسال
يا (إمّ)ها ماعاد ينفع حنيني
خلاص عندك.. ريم.. والبندري عيال
مافيه داعي بعدها تتعبيني
من بعد هذا وش عندي من أقوال
وتسأليني ليه وش صار فيني
صحيح بعض الهم يجرح وقتّال
وإنتي بيدينك للأسف تقتليني
وإن كان ندمانه وحظك (معه) مال
أنا نسيتك وافهمي وأعذريني
بس إذكري.. قولي حبيبي ترى قال
مها.. مها.. أرجوك.. لاتتركيني
نازف