وتشوف في صورة ... لحم العجول

دا مش كلام دي مش أصول
أحكي لمين طيب وأقول
في اليوم بشوف الأربع فصول
عايش أنا على زيت وفول
مفيش لحوم مفيش بقول
دا مش كلام دي مش أصول
أشكي لمين طيب وأقول
اصبر يا صابر يمكن تنول
والسهرة تحلى والليل يطول
وتعيش يا صابر أحلى الفصول
وتشوف في صورة لحم العجول
دا مش كلام دي مش أصول
أشكي لمين طيب وأقول
يا ناس بقالي شهرين ويوم
باكل زبادي وأصبح أصوم
فيه ناس يوماتي تفطر لحوم
وأنا بنام على الفول وأقوم
دا مش كلام دي مش أصول
أشكي لمين طيب وأقول
يا ناس حرام إيه العمل
دا شيء يا صابر يحتمل
الحلو عمره ما اكتمل
لازم يكون عندك أمل
يمكن في يوم تاكل جمل
دا مش كلام دي مش أصول
أشكي لمين طيب وأقول.
القاهرة - د. أحمد قنديل