هدوء نسبي .. مالي.. قلب!

قال: مالك قلب!
وانته؟؟
قلتها له!
قال: أنا ماااالك قلوب!
قلت: شقّة.. ولاّ تمليك.. أو هوْ فلّة؟
قال: كلّه!
المهم أني دفا.. ماني جفا
من دون قلب.
قلت: يا هذا وأنا؟
قال: أنتِ؟
أنتِ مالك قلب مالك
قلت: مالي؟
قال: إيه!
قلت: فعلا راس مالي
بس قلب!
قلب ما يقبل خسارة
عشتْ يا حِسّ التجارة!!!
في تهكّم قالها.. واْكمل ب قسوة:
أنتِ معقولة بشر؟؟
تشعرين؟
تنبضين؟
فيه أمل لو مرّة وحدة تعشقين؟؟
جاوبيني!!
لو عطيتك قلب لِكْ وحدِكْ
أكون ب ذي العيون؟؟؟
وفي عنادٍ
في تحدي
في ضجر
قلت: لا يمكن أبدّل
خير.. وآخذ شيّ دون!
بعد فاصل صمت يملاه الضجيج
قال: روحي!
قلت: هاه!
قال: قصدي
روحي نامي!
عالم الأرواح
أكبر
من براويز الأسامي
قلت: روحي!
قال: سميّ!
قلت: قصدي.. روحي أجمل
روحي أعلى
روحي أكمل
من حكي ماله هدف
إلا لثامي!!