متحدي الإعاقة

هذه القصيدة كنت قد افتتحت بها أمسيتي التي اقيمت في مهرجان القرية التراثية بجمعية الاطفال المعاقين بالعاصمة الرياض مؤخرا..
من لقلب اللي تبي طفلٍ شفاقه=عقب عشر سنين من صبرٍ طويل
بشروها بالحمل حين انبثاقه=من سعادتها بغت ترقى سهيل
صار مُرّ وحامها حلو مذاقه=وحملها ريشة.. ولو انه ثقيل
وابتداها الطلق معلن انطلاقه=وافرحت رغم المواجع والعويل
وجابت اللي ينبض القلب اشتياقه=كل حسنٍ جنبه بيصبح ذليل
وجت لها من لا خلت منها الطفاقه=وافتحت لآمالها باب الرحيل
وببساطة قالت: "ف ولدك اقتيل"!=كنّها قالت "ترى ولدك قتيل"!
ومن بعد عشرين غشية واستفاقة=وكلّت لله وهو نعم الوكيل
واودعته ويا صعب ليلة فراقه=عند من خلوّا رعايتهم سبيل
واختلط مع فرقة صاروا رفاقه=وانعشوا في داخله حلمٍ عليل
ما كأن لظروفهم فيهم علاقه=والإرادة ما تعرف المستحيل
لا انحرم من شوف/ هو يحكي بطلاقه=ولا نحرم من سمع / في رسمه جميل
ولو عجز يمشي على رجله وساقه=ما عجز يقطع بعقله الف ميل
ولو قصر تفكيره ووثّق وثاقه=لا ابتسم.. بدّل همومك سلسبيل
كل طفلٍ عاش متحدي الاعاقة=مبدعٍ... واللي هنا.. اكبر دليل