ياوجد عيني

قالوا جديدك يا مها وش هو اليوم
قلت اسمعوا يا ناس هذا جديدي
البارحة من لذة النوم محروم
يوم ان نور العين عني بعيدي
الناس في كومن وانا عنهم بكوم
مغير افكر وارتجل بالقصيدي
واقول للعذال يا قوم يا قوم
تريحوا من عذلكم لا يزيدي
صحيح بالاجواد معطى ومحروم
وانا عطايه نور عيني وسيدي
مرة سنه ما اوحيت طاري ولا علوم
الا غلاهم ساكنن في وريدي
قامت هواجيسن على راسي تحوم
حاولت اهديها وقامت تزيدي
ياوجد عيني وجد من طاح في قوم
صكوا عليه مقيدن بالحديدي
لا هوب لاعايش ولا قيل مرحوم
عقب الترف والعز حالة شديدي
اليوم في سجنن بالاحكام معدوم
يبا الفرج من عند رب العبيدي
يالله ياللي فارض الحج والصوم
انك تيسرها على ماتريدي
وتنام عين اللي مولع ومحروم
عاف المنام وعاف لبس الجديدي