ما لوم قلبٍ حن للماضي وهاج

اللي ضحك لك (قلبه اسود من الصاج)
ما به من الأجواد لو هي علامه
حتى صديقك ما لقى أي مخراج
مسكين لكن ما تفيد الندامه
أنا ادري انك عايش بضيق واحراج
ليلك طويل وزايدٍ في ظلامه
مثلك ومثلي علّته مالها علاج
والكل منا ماحصل له مرامه
نمشي بها الدنيا لو الحظ منعاج
من مثلنا ياصاح من جاه لامه
يلومنا منهو تغطى بديباج
ماهمه بدنياه إلا منامه
من حر مابي كني مضروب كرباج
أبغى السلامه ماحصل لي سلامه
مالوم قلبٍ حن للماضي وهاج
على مناعير الرجال وكرامه
اللي يزورونا بدفعات وأفواج
وانا مزاجي كان هذا غرامه
مابين هبة ريح مع ضحكة حجاج
يلقى بها الرجّال كل احترامه
واليوم ماعينت بالحي دوّاجحتى زماني اختلف في نظامه
يا خالد من الوقت انا شفت الازعاج
تاه الفكر ما بين عذل وملامه
وانت الاصيل اللي كما فيض هدّاج
يا فزعة اللي قاسي الوقت ضامه
المسعد اللي ماهو للناس محتاج
من المجد في يمناه ذروة سنامه
حتى الليال السود يصبح لها سراج
به يقتدي حرٍ سرى باليمامه
من زاد ماله حط له قصر بسياج
واصبح عزيز الجاه مرفوع هامه