( اطفال كنا )

الاهداء:الى ابني ناصر وصديقي الغالي مهدي..
هذا صديق الصبا والصغر يا ناصر=هذا ولد عم شوفه يشرح الخاطر
هذا صديق العمر والعسر والضيقه=من نسل عود(ن) فعوله صيتها عامر
(مهدي) ليا حل ذكر الطيب والفزعه=له في علو الفخر منزاله وماكر
صديق عمر الطفوله يوم انا كبرك =طفولة(ن) في خفوقي ذكرها عاطر
اذكر ليا جيت حارتهم محد قدي=لا قال هذا (ولد عمي) ترا شاعر
واذكر من الطيش لا من جا بحارتنا=ما كني الا غديت لحينا زامر
ما نام بالعيد من شأنه يجي بكره=وليا مشى تسمر رجولي وانا اناظر
كنا للأحلام نرسم ورده وغيمه=ما همنا وش يصير وش يجي باكر
اطفال كنا ما نرضى تطلع الزله=اصغار نجحد ظروف الوقت ونكابر
هذا يا ناصر صديق وصاحب(ن) غالي=ما يفترق شملنا بأذن الله القادر