قصيدة للشاعر بندر الثبيتي

الخطوه اللي ما تعزك بممشاك =لا تهتويها وأقصر الرجل عنها
لا صار ما ترفع مقامك بدنياك=احذر اتجاملها وترخص ثمنها
لا هنت نفسك طحة في موقع خطاك=وغنت عليك اهل الصغاين لحنها
وفرحوا على طيحتك ذولا وذولاك=ولا فيهم اللي يوم جاته دفنها
ناسن تبى تسعى على هدم مبناك=الكره فيها والدعايات منها
لا صار ما ترفع مقامك بيمناك=اهل العطاء بالله لا تمتحنها
الوقت يمضي والمنايا تحراك =أيام خبل اللي بعقله ومنها
لا قام حضك وانتهض طاب مسراك=حساد فعلك في الحياه اتغبنها
تارد وتروي ضامي الكبد من ماك=خيرك يعم الدار واللي سكنها
البحر ما همه كثر جول الاسماك=ما همته مادام قاعه وطنها
والعين حاير شوفها خلف شباك =ترقب زمن ياتي يغير زمنها
واليا ادمعة قالوا لها ويش بكاك=تشره وشرهتها على اللي سجنها
دمعة حزن ياشامخ الراس تنخاك=من نفس محزونه وباين حزنها
بين الموادع والمقابل والادراك=اللي ملك حسن النويا ضمنها
الرجل ما تقوى المشي فوق الاشواك=لازم بمشيك تبعد الشوك عنها
حتى يطيب الحال ويزين ممشاك=وتترك مجاملها وتغلي ثمنها
بندر الثبيتي