فل الشراع

ياالله يا خالق جميع الخلق في كل البقاع
والناس تسعى جاهده تطلب رضاه بطاعته
يااللي بذكره تطمئن النفس ويصير المتاع
مشفي جروح اللي صواديف الشقاوه لاعته
تجلى الهموم اللي كما المركب ليا فل الشراع
والوقت بحر من المشاكل ما عرفنا قاعته
أمشي واساير وقتي الماخوذ قدر المستطاع
ولاني على كثر الظروف اللي تجيني ناعته
ويا هاجسي مهما حصل بالوقت فامر الله مطاع
يزين حال الآدمي مهما المشاكل صاعته
ما بعد عسر الحال غير اليسر لو طال النزاع
لا بد تصدف مع مرور الوقت موعد ساعته
يجي فرجها من ولي العرش مالك كل باع
ما دام من يشري رضا دنيا الشقاوه باعته
والرجل لو يشفق على كسب الجزايل باندفاع
كل العرب وسط المجالس بالجزايل ذاعته
لا جاته الجزله يفز وينتهض نهضة شجاع
يشبع بها واليا تأخر عن لقاها جاعته
يصبح سعيد دام ذكره بالنعم دايم يذاع
ويكبر فخر قدام الاجناب ونظر جماعته
لان الذي يبذر بذور الخير من دون اصطناع
يجني بها حب الخلايق من سبب زراعته
ولا بد يكعم من وساويس المريد بكل قاع
لأن الحرايق ما تجينا غير من ولاعته
عادل بن ضيف الله الأسعدي