رثاء في الملك عبدالله رحمه الله للشاعرمضواح بن شتوي

غيّب الموت عنا راس صقر العروبه
مات والموت سنه ما عليه اعتراضي
سنة اللي رجينا منه عفو ومثوبه
ربنا اللي يجازي العبد واللي يقاضي
غاب من جود كفه مثل مزن نصوبه
بعد عجف السنين الحمر يروي الاراضي
غاب درع الوطن وأسوار ستره وثوبه
غاب ساس الوفاء والمجد والانتهاضي
غاب من ميلة عقاله شنار وعذوبه
غاب منهو لفعل الحق والعدل قاضي
غاب من مشرق امجاده يصافح غروبه
بارق المجد في عهده على العز ناضي
غاب مخلص زمانه غاب مرضي شعوبه
غاب من كان شعبه عنه قانع وراضي
غاب منهو لعدوان العقيدة عقوبه
غاب شّم الجبال النايفات العراضي
غاب من فطرته على مناهج دروبه
للتكلف وحب الذات ما هو بفاضي
يالله اعفاك له وارضاك في كل نوبه
نورنا اللي علينا كان يسطع وياضي
وان تجازيه عنا خير وأغفر ذنوبه
وارزق نفوسنا بعده صبر واتعاضي
واجعل النور في قبره وفرج كروبه
يوم يأتي نهار الحشر والانتفاضي
واجعل الخير في اللي كل الأنظار صوبه
في ملكِنا ملك الاسره وأمير الرياضي
يوم كان القبائل تطّنخ لا انتخوبه
يارد الطايله سلمان وردٍ الحياضي
ايه سلمان ابن عبدالعزيز افرحوبه
قائد هيبته ما بين حاضر وماضي
في شمال الوطن ولا نهاية جنوبه
شرق شط الخليج وغرب وادي حماضي
وكل شبه الجزيره تحت داعي وجوبه
ان زهمنا ملكنا صار للموت حاضي
حن جنوده ليا بان الردي من عيوبه
وانكشف سر من قلبه مريض مغاضي
حن عَصب كف واللي شذّ تكوا جنوبه
لين يعرف طريق الحق والافتراضي
وان رفض من طريق الحق يبقا اعجوبه
يحتمل حر مابه لين يلضاه لاظي
من يخون الوطن يصبح لغيره جلوبه
سلعةٍ حطها الغشاش بين المقاضي
وان رجع والخيانة فيه يبقاء أسلوبه
مثل منهو يصلي الفرض ماهو بواضي
ما يفيدونه اللي بالغلط غرروبه
نزغة ابليس من تحت الصفاء والقضاضي
ما يكّفر ذنوبه غير رجعه وتوبه
علّ يغشاه من بعد السواد البياضي
مضواح بن شتوي
ِ