قصيدة للشاعر جابر بن ناصر

الله ولابعض العلوم اللي تضيق بها الصدور
ضاقت صدور طبعها صعب يبيح سدها
المؤمنه بإن الزمن طبعه على العالم يدور
واللي كسبها اليوم بعده مادرى وش مدها
لايأمن الدنيا ولايحسب مكاسيب الشهور
تخفي الليالي غيبها وتضد ماحد ضدها
حتى الاوادم لو تعلو ف المباني والقصور
لابد من يوم يجيها يومها ويهدها
لو كان للدنيا بقاءا كان ماجو ف القبور
الانبياء لكن عمار وصلت لي حدها
ياللي تحسب انك معلم والرجال بهم قصور
لاوسعد الله ان لك عيون مبصره وتلدها
حتى تعرف ان لك عيوب جمعها زايد كسور
عيوبك أولى من عيوب الناس ياخي بدها
اسمع نصيحة شاعر ماغرته دنيا الدبور
لاتستهين بعالم ياخوك منت بقدها
خلك معا العالم طبيعي لايغيرك الظهور
مع عالم شفنا هزلها قام يسبق جدها
يالله دخيلك لايجي لي حاجة عند معثور
وان كان جالي حاجة ( ن ) فانت الكريم وسدها
ياقاضي الحاجات تقضي حاجة العبد الشكور
وليا عطيت الحاجه فماحد يروم يردها
يامنزل راع الكبر والطيش واصحاب الغرور
رحماك ياللي لك فضائل ماستطيع اعدها
ارحم وسامح ياكريم الوجه في يوم النشور
واعداءنا ياذا الجلال الواحد انك تلدها
الشاعر/ جابر بن ناصر