طابور الصباح

يا سبحان الله، على كثر ما عندنا ناس مخلصة وناس تملك عقول كبيرة بالتعليم بس ماش ما فيه إنسان قادر على التجديد، يخافون من الانتقاد والقال والقيل، أذكر وأنا بزر دايم أفكر وش فايدة طابور الصباح؟ أقول يمكن قصدهم يحرك الدم في المخ ويصحصح الطالب لكن بعد ما تاخذ نص ساعة بالبرد والا الحر تدخل الفصل وانت ودك تحط راسك على المخدة لأن طابور الصباح استهلك نص طاقتك وصجة ولجة وليش متاخر عن الطابور ولاجيت مبكر تحط كتبك ورى كتب اخوياك اللي جايين قبلك، ثمن تروح تسولف مع اخوياك ولا دق الجرس بداية الطابور تجي تدور كتبك بين رجول الطلبة.. يا شباب من شاف كتبي؟ يا شباب شنطتي فاضية من اللي أخذ الكتب اللي فيها؟ يا شباب لو سمحتوا اللي أخذ زمزمية الماء من شنطتي يرجعها، يا شباب علبة هندستي من أخذ من كتبي؟ يا شباب اللي شاف كتاب علوم مكتوب عليه اسمي يرجعه لي، بغض النظر عن مشاكل الجو والبرد والحر، طابور الصباح مشاكله أكثر من نفعه، بس حنا ما نحب التغيير غير بعد ما يموت أحد عشان تصير قلوبنا قوية ونتخذ قرار ماحد ينتقدنا عشانه.