مااشجع أحد.. بس متعصب!

كلنا نتذكر مشاهد من لقاءات أو حوارات يطلعون فيها مشاهير الصدفة والحظ عشان يجلسون ساعة يزعجونا عن هواياتهم اللي ما لنا دخل فيها، ويقولون كلام كبير ماهم فاهمينه.. واذا سألوا الواحد فيهم «كيف علاقتك بكرة القدم» سوى لك فيها انا اللي مقطع البرستيج وقال لك انا اصلا ما عمري تابعت كورة «وتلاقيه قبل مايشتهر باسبوع كان واحد من اللي يطبون الملعب في نص المباراة ويلحقونهم الشرطة». والا يسأله المذيع «طيب وش تشجع» وتجيك الاجابة الدبلوماسية «انا ماعندي فريق معين لكن احب الكورة الحلوة» على اساس الاخ عنده آلاف المعجبين ومايبي يزعلهم بانتمائه، وتلاقي كل جمهوره ما يتجاوز عدد لعيبة فريق، طبعا هذا اذا حسبنا معهم اخوياه اللي في الاستراحة وعيال عمه وجيرانه!
الموضة هذي تغيرت من تالي، وصاروا المشاهير يزعجون اهلنا بأنديتهم، وفي كل مجلة تلاقيه طاق تكميلة فريق معها طاقية وشال وماسك كورة ومسوي علامة النصر «موب الفريق طبعا» تسأله.. وش اخبار مسلسلك الجاي؟ يقول لك.. والله انا الحين موقف التصوير واتفرج مباراة فريقي الفلاني، ومن بكرة يطلع خبر وش كبره في المجلات الفنية يوثق هالتصريح العظيم، ومو بعيدة يحطون صورته وهو يقول في المانشيت «حبة حبة ياكلك» و«اكويهم كوي»، ما اقول الا الله يرحم ايام «مااشجع الا المنتخب!»