علاج الأطفال «المصرقعين»!

بعض البزارين الله يصلحهم كنهم مركبين ماكينه فيراري، تلاقيهم في البيت شغالين مطارد وقالبين اثاث البيت قلب كنهم في ملاهي، وبعضهم له صوت مميز في المصارخ كن امه متوحمه بونان اسعاف، ما تقدر تجلس في البيت اللي هم فيه خمس دقايق على بعضهم، وبعض البزارين ما يتعدل الا بعد ما يتكرفس هو وثلاجة المطبخ وينكسر له كم ضلع عشان يقضب الارض ويهدا زي البزارين الثانيين، بعض البزارين المصرقعين ودك تربطه ربط ولاينفع معه مفاوضات سلام او انذار بحصار دولي، وين مايروح يكهرب الجو وينزع بسط الناس اللي حواليه، والاهالي اللي عندهم مثل هالبزارين المفروض يفكون الناس من شرهم وشر بزارينهم ولايجيبونهم للمناسبات او ياخذوهم للعزايم، خلاص لاتبلش العالم بزارينك، الناس تلمح لك، وتشتكي لك وانت ضارب طناش وحاس ان ولدك مظلوم، البزارين اللي مثل هالنوعية ما ينفع معهم الطق، وترى كل ماطقيتهم تتبلد اعصابهم ويزودون اكثر واكثر، اخر ما توصل له علماء علاج الاطفال المصرقعين يقول لك لاتطق البزر، عالجه بطريقتين، الاولى انك تحرمه من العاب يحبها والثانية انك تخليه يوقف في ركن من اركان الغرفه ووجهه للجدار، طبعا لاتوقفه ساعات او يوم كامل، حسب تحمل الطفل وعمره، اخاف يطب ساكت وتدعي علينا بعدين!