شاهد عيان من الشارع العام، على الأعمال الرمضانية ونجومها.. له وجهة نظره تجاه ما تابع من الأعمال وله رأيه الخاص بالطبع.. وش اسمك؟ سالم النجراني. يقولون الأعمال الدرامية السعودية ماكله الجو صحيح هذا الكلام؟ ما فيه إلا عملين. وشهو؟ أكيد «طاش17»، «سكتم بكتم». وباقي الأعمال؟ لك عليها صراحة ماهي ذيك الأعمال اللي ممكن الواحد يحرص على متابعاتها. من خلال مشاهدتك المسلسلات السعودية والخليجية وش اللي أعجبك؟ غير «طاش» فيه مسلسل الفنانة حياة الفهد ليلة عيد وشر النفوس. وش تشدك أكثر الدراما والا الكوميديا؟ أكيد الكوميديا لأن حنا ملينا من الدموع والصياح. طيب من اللي يعجبك من الفنانين؟ ناصر القصبي فقط. ومن الفنان اللي ودك تطفي التليفزيون إذا شفته؟ حبيب الحبيب. ليش؟ لأنه يقلد ناصر وواضح تأثره فيه. طيب شخصية مللت منها من خلال المسلسلات وتكررت كثيرا؟ مناحي للفنان فايز المالكي ورشيد فهد الحيان. بس فيه ناس حابين هالشخصيتين؟ بكيفهم بس أنا ما أعجبتني. مسلسل تمنيت أنه كانت له أجزاء؟ مسلسل عيال قرية بصراحة مسلسل مره حلو وأتمنى أن يقدموه ثاني مرة. ممكن نعرف السبب؟ لأنه انظلم في جزئه الأول وكان مسلسل رائع. تتابع البرامج الدينية؟ أكيد خصوصا وقت الظهر. وش أكثر برنامج شدك؟ تصدق ما أعرف أسماءها بس أتابع. إذا الريموت في يدك وش أول محطة تحط عليها؟ شوف على حسب المسلسل اللي أتابعه وقتها بس إم بي سي أكثر قناة متابعة بالنسبة إلي. كيفك مع برامج المسابقات؟ ما أتابع إلا برنامج واحد بس وهو سباق المشاهدين. وش عاجبك فيه؟ الجوائز حقته وطريقة تقديمه حلوه. وش رأيك في برامج الكاميرا الخفية؟ حلوه حتى لو إنها مفبركة. أي برنامج تحب؟ برنامج حيلهم بينهم وأوف سايد على القناة الأولى.
