دحين راسي حينفلق من شيل الأكياس وانتي جالسة تكركري وتضحكي؟. طيب على مهلك ننزل الأكياس سوا، بعدين انت ياسيدي منت عارف ايش الحكاية ؟، ايش الحكاية ياستي.. سمعت جارتي بتزغرط ولما سألتها ليش بتزغرطي قالت انه زوجها جاب دجاجة وقال لها كل شي في الدجاجة تطبخيه يعني الكرشة والفشة والكلاوي والقلوب والكبدة تسويها تقاطيع.. والرجول تسويها مقادم .. معاه حق لانه اللي جالس بيصير في سوق الدجاج واللحوم لا يرضي الله ولا ورسوله.. طيب ايش دا اللي جايبو معاك ياسيدي ؟، هدا ياستي كيس فول وكيس عدس وكيس فاصوليا ناشفة.. وليه دا كلو ياسيدي ؟، عشان ياستي لا نبغى ناكل لحم ولا نبغى ناكل دجاج، ولو كل الحبايب اللي في البلد سووا زي ما بسووي أنا ولمدة شهرين بس حتلاقي كل تجار اللحوم والدجاج وكل أصحاب المولات والسوبرماركات جالسين يلطموا لأنهم حيخسروا ملايين الريالات لانه لما نقاطعهم وما نشتري منهم بضاعتهم حتعفن وتخيس.. هلكونا هادول التجار جابوا لنا الجنان كل يوم والتاني نسمع منهم اسطوانة وكل يوم والتاني بيرفعوا سلعة معينة واللي حينضر هو المستهلك الغلبان اللي مو عارف يلاقيها من فين والا من فين.. إيجارات الشقق هلكته والمواد الغذائية كل يوم والتاني ولها سعر ، وكل شي يخطر في بالك ارتفع سعرو ما عدا المواطن الغلبان اللي جالس يكد ويكدح ومحد داري عنه.. والتجار ياقلبي عليهم جالسين يلعبوا في السوق على هواهم لا حشمة ولا عيب، ووزارة التجارة وحماية المستهلك ما عندك أحد لا أرى لا أسمع لا أتكلم.. والتجار عاجبتهم دي الحكاية لأنها ما تفرق معاهم طالما أرصدتهم في البنوك وعقاراتهم مسورة في كل شارع وحي.. عشان كدا بقول لكل الحبايب قاطعوهم واسمعوا وطبقوا في حياتكم كلام سيدنا عمر بن الخطاب رضي الله عنه لما الناس كانوا بيشتكوله من ارتفاع الأسعار حتى انهم اشتكوله من ارتفاع سعر اللحوم وشوفوا ايش قال لهم سيدنا عمر رضي الله عنه في حكاية ارتفاع أسعار اللحوم: (غلا اللحم يا أمير المؤمنين فسعره لنا، فقال: أرخصوه أنتم!! فقالوا: نحن أصحاب الحاجة فتقول أرخصوه أنتم، فهل نملكه حتى نرخصه وكيف نرخصه وهو ليس في أيدينا !؟ فقال لهم : اتركوه لهم).. عشان كدا بقول لكل الحبايب خلوا عندكم ثقافة المقاطعة واسمعوا كلامي واتركوه لهم وحتشوفوا نتايج المقاطعة ولمن تخلصوا من قراية المقال كل واحد فيكم يركب سيارته وعلى دكاكين باب مكة يشتري زي ما اشتريت أنا وصدقوني ما حتندموا بالعكس حتكونوا كسبانين لانة الفول بيقولوا عليه كتير من خبراء الأغذية انه لحمة الفقراء.. ويارب احشرنا مع الفقراء والمساكين ولا تجعل الدنيا أكبر همنا ولا مبلغ علمنا وارحمنا برحمتك يا أرحم الراحمين.. وعيشوا كتيييييير تشوفوا كتيييييير. للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة [email protected]
