دحين هي دي المقاضي اللي قلت لك تجيبها ياسيدي ؟، والله ياستي هدا اللي قدرت عليه وزي ما بيقولوا الحبايب ( مد رجلك على قد لحافك).. يعني على كدا حتنزل للسوق كل يوم ؟، ياستي كل يوم كل يوم ولا جشع وطمع التجار اللي ما يخافوا الله في عباد الله هادول اللي طفرونا وما خلونا نتنفس، كل يوم والتاني وهما بيرفعوا في الأسعار.. طيب ياسيدي هادول التجار مافي أحد قادر يوقف قدامهم ؟، لا ياستي مافي أحد إلا من رحم الله منهم واللي عندو شوية خوف من الله.. أما وزارة التجارة وحماية المستهلك فسلمي لي عليهم لا يهشوا ولا ينشوا.. بس انت ياسيدي شايل بالمرة على التجار.. لا شايل ولا حاطط، وبعدين هو اللي بيسووه فينا قليل وآخرتها فضيحتهم الكبيرة اللي فضحتهم فيها وزارة التجارة.. ايش هادي الفضيحة ياسيدي ؟، هاتي الجريدة حق يوم الاثنين اللي فات وانا أفهمك الهرجة.. شوفي الخبر دا ايش بيقول.. بيقول ياسيدي.. ارفعي صوتك وخلي الغلابا والمكدوحين يسمعوا صوتك.. حاضر ياسيدي.. بيقول الخبر: حصلت وزارة التجارة والصناعة على معلومات تؤكد وجود صفقات تصل إلى ملايين الريالات يبرمها مستوردون، وتجار، ووكلاء علامات تجارية مع أصحاب محلات بيع كبرى شهيرة في المملكة تعرف بمسميات «سوبر ماركت» أو «هايبر ماركت» أسهمت بشكل مباشر في رفع أسعار السلع وتفاوت قيمة بيعها من موقع لآخر ومن مدينة لأخرى. وتدور عمليات إبرام الصفقات في إطار ما يسمى تسويقيا ب«مزيج المكان» الذي يقصد به مكان وجود البضاعة، إذ يبحث أصحاب البضائع عن مواقع بارزة لعرض منتجهم بواسطة خطة تسويقية مكلفة تهتم بتمكين المستهلك النهائي من الوصول إلى السلعة في أقرب وقت دون عناء. وعشان أفهمك وأفهم غيرك ايش معنى الكلام دا هو انه بعض أصحاب الهايبر ماركت أو السوبرماركت طماعين وجشعين زيادة على اللزوم بتأجر الأماكن المميزة على التجار بأسعار غالية وغير كدا انها بتسمح للتجار بالمزايدة على الأرفف المميزة.. والتجار زي منتي عارفة بيستأجروا هادي الأماكن المميزة في الهايبر ماركت بأسعار خيالية عشان يعرضوا منتجاتهم ويقوموا التجار الطيبين بعد كدا بإضافة تكلفة الإيجار على قيمة السلعة والمستهلك الغلبان هو اللي يروح فطيس عشان كدا لازم تكون وزارة التجارة وحماية المستهلك شادة حيلها في الحكاية دي.. يعني بالبلدي كدا لازم وزارة التجارة تثبت سعر الأرفف في أي هايبر ماركت وما تكون الحكاية مزايدة في مزايدة ما بين التجار لأنه طالما فيه مزايدة على سعر الرف في الهايبر حتجي المصيبة على المستهلك الغلبان وغير كدا أتمنى من وزارة التجارة أنها تقوم بتثبيت أسعار السلع لأنه اللي جالس بيصير في السوق لا يرضي الله ولا رسوله لأنه الأسعار متفاوتة من دكان لدكان.. عشان كدا بأقول لوزارة التجارة وحماية المستهلك ولحبايبنا التجار خافوا الله فينا اللي فينا كافينا وارحموا من في الأرض يرحمكم من في السماء وصدقوني ياتجار نهايتها حفرة ومتر قماش وقطنة.. وحسبي الله ونعم الوكيل.. وإني امرؤ صائم.. وعيشوا كتيييييير تشوفوا كتيييييير. [email protected]
