بحر الهوى

ياورق ياللي تهيض قلبي الداله
الله يجازيك صوتك هز وجداني
الايام تمضي وعبد الله على حاله
ماراح من يوم يرجي يومه الثاني
يصفق براحة يمينه راحة شماله
ويجر صوته علي عذبات الالحاني
والقلب كن فيه لي سجيت خياله
من واحد(ن)كل ماسجيت يلقاني
ولي قلت باجيه عذالي وعذاله
تحكم على المتهم وتخلي الجاني
حبيت واجد وحبه عاده لحاله
آجيه غصبا ومر آجيه بلعاني
ياجوهره وقف الشاويش ورجاله
من دونها بالقنا وامات تيجاني
من قال بنساش فال الله ولا فاله
حلفت ما نساش لين الناس تنساني
وبحر الهوى كل من يمشي علي جاله
لابد مايشتكي ويصيح ويعاني
شربت من دلته فنجال وبياله
وشربت في كوب بس الشرب مارواني
عشنا والايام معتدله ومياله
والحكم لله فيها والعمر فاني
واليوم ياورق خل القلب في حاله
دور وتلقا مكان ومستمع ثاني
عبد الله بن حيسي