تعال كلك

تعال كلك .. واحلف آصير لك كل
أو .. روح كلك .. ما أبي بعض كلك
ترا (الوسط) .. شمس نست فكرة الظل
وان صرت ظلي .. غصب بصير ظلك
المشكله .. لا صار في قربنا الحل
الحل بعدي .. أو هو البعد حلك
مليت من قلب يحبك ولا مل
خلك بعيد .. آخاف تقرب و املك
إلى متى وآنا احتري سيفك يسل
سليت سيفي .. قبل سيفك يسلك
أذل قلبي .. قبل عقلي لك يذل
لا عاش قلب صار نبضه يذلك
الحزن .. غيمه .. وبلها ما بعد هل
إغنم جفافي .. قبل حزنك يهلك
دام الطريق لخطوتك ما بعد دل
أبتركك .. يمكن ضياعك يدلك
* عبد اللطيف بن عبد الله آل الشيخ