مفرق الخاطر...

على مفرق الخاطر..على ناصية حرفين
ترجلت عن ساقي.. وعكازي احصاني
ثلاثين عام «يارغيف» الشقى «حافين»
ركبت الأمل.. لكن شف وين وداني
سلكت الطريق اللي يودي الى صفرين
فتاته خذلني واعطب الملح شرياني
كتوف المواجع مثقله بالخشب والطين
وسيل المزون.. يبل كفي ولا ارواني
ونبضي يحث الوصل يبحث لعسري لين
ثمل شيب راسي ما تعديت جدراني
على سير متحرك على نية التخمين
محلي يراوح والزمن واصدق احزاني
ونا كنت اظن اني تجاوزت سور الصين
وحلمي يكابر بين سجني وسجاني
ولا شلت في يدي قنابل ولا سكين
سوى اللي تذكي واجب الضيف والعاني
تماديت ياصبري وماطلت رد الدين
وعين الفرج من بين الابواب تعماني
هدمت العمر قدام عيني بلا تابين
ولا روض الجلاد نفسي وشيطاني
وانا ناحت كهفي على صخرة التكوين
نديمي قرين الشعر يصدق ويعصاني
على وين يا حظ قسمني على قبرين
ونا حي و«اسمي» صوت ذيبي وقمصاني
ترجلت عن صهوة دروب الزمان الشين
ولا سلمت روحي جنودي وميداني
لضحك النهاية.. والصور لعبة التلوين
ضحك لي زماني.. لين بالضحك بكاني