القلب الحنون

اي نعم مقبول عذر الشعر ويقدر مصابه
لو خلي البال في بعض المواقف ماعذرني
كل يوم يقول شل الصوت ياراعي الربابة
غن بوح الشاعر اللي كل ماينزف يغني
والفقيدة.. فوق حمل الشعر واحروف الكتابة
والزمان اللي عرف سري على غفلة غدرني
ايه يا القلب الحنون اللي بذل صهوة شبابه
ايه يا طهر البتول اللي حمى المهد وحملني
ايه يا وجه الشموس اللي له اركع في مهابه
ايه يا ثغر الحياه اللي على الدنيا رسمني
وأأأه يا كف السحاب اللي تطهر به خضابه
ان سجدت اقبله وآخر لاقدامه رفعني
أأأه كم همست غرام في عتاب وفي دعابة
ترقص اشواقي لها والدهر من عشقي حرمني
كيف اوصف عطرها وانا تغذيته صبابة
كيف اوصف ضحكها من سوط سجاني عتقني
كيف حالي بعد فقد أمي وليل الهم غابة
كيف صبحي يستفيق وعزف عكازه هجرني
لاطرق بابي مع كحة ودعوة مستجابة
صوتها قبل المؤذن بالسما العليا ربطني
قبل فرقاهاجروحي في معادنها تشابه
لين عند القبر خلتني وسط جرحن قبرني
غادرت جنة الى الجنة و للضيق الرحابة
غادرت .. ياليتها في ساعة الفرقى خذتني