وش مستفيدة؟!

وش مستفيدة اضحكت قالت اشعار
لا تقول لي يا سعود وش مستفيده
أزعل وتمطرني تباريح واعذار
يا فرحتي: وانا سبايب قصيده
أعيد لك ذاك التوهج والاعصار
وتسقي محبينك فريده فريده
إلى متى غايب عن احساس الانظار
وعشاق شعرك عن قصيدك بعيده
بدّخلك في لعبة الثلج والنار
واخرّجك باجمل قصايد جديده
بصير لك الهام وجنون وانهار
عادي ولو قلبك تقطّع وريده
وتصير لي فارس حقيقي ومغوار
وانسى معك قسوة زماني وكيده
حمامتك تخشى حمامات هالدار
احساسها يقول ما هي وحيده
بالمختصر اغليك واخاف واغار
متشتتة ما لي بحبك عقيده
متلذذه متذوقه عزف الاوتار
الله محلاني بفمك نشيده