يرقى مع الطيب

مرثية الشاعر عيد عويد العنزي في خاله عويد صلفيق راضي العنزي «رحمه الله»
يامل قلبٍ لايعه حر ماجاه
لوعة رضيعٍ فاقد جنة أمه
ينشد حنانٍ باول العمر رباه
يذكر حنانٍ لا لفى له يضمه
يصيح وينادي على طول يماه
ويشم ريحتها على اطراف كمه
عليك ياللي سبب الحزن فرقاه
حزنٍ تشتت بي بلا غير لمه
فقدت من يارد جسوراً على عداه
محزم فشق للأجنبي وأبن عمه
خالي ولا ترجف مع الهوش يمناه
جتني بأخو خلفه كبير المطمه
تسج رجلي بالدجا وأتحراه
والحزن يأخذ بي على كل يمه
قدام عيني والليالي تعشاه
ياليت ينبدل وأشيل المهمه
ماهو بخيلٍ غره البخل وأغواه
لا نادوا الحايز على الطيب سمه
بالطيب دايم تفعل الطيب يمناه
يرقى مع الطيب على راس قمه
ياعل خالي جنة الخلد مثواه
وجعل الولي لأعتق عباده يعمه