لأجل الوطن

الحزم دقت ساعته واحتمى الراس
وقلب الخليج اليعربي فار دمّه
ميعادنا ماعنه صده ومجلاس
لا والله الا كلنا للمهمّه
ابطال مافينا منافق وبلاس
كلٍ يشمر للمواجيب كمّه
عسكر ودون الدار بالدرع والطاس
متكاتفين بقو هيبه وهمّه
لأجل الوطن مانقبل اخماس واسداس
يبقى العلم مرفوع في راس قمّه
للجو طياره وللبحر غطاس
والبر دونه من يضد المطمّه
اعتادنا حامي لدقنّ الاجراس
والامر لاجانا نتمّه نتمّه
يامر علينا الفيصلي طيب الساس
لامن غضب كل داب يفنا بسمّه
وعند الرضا يعطي بلا حد وقياس
غيثٍ غزير وكل قاعٍ يعمّه
سلمان واسمه عز في كل نبراس
حاكم ويحكم في عداله وذمّه
بعد اطلبه جاره قطع دابر الياس
قال النصر من اقبل اسميه سمّه
صدر قرار الحرب والحرب مقباس
وامسى العدو يخط الطريق ويخمّه
جاته عواصيف السخط تضرس اضراس
يمسي ويصبح بين همه وغمّه
مع ظلمة الليل وعلى هجعت الناس
ضج الفضا فالليله المدلهمّه
من رجفة الصاروخ ضاعن الانفاس
الرجفه اللي اربكت كل يمّه
غاره ورى غاره وللحد حراس
نارد عدود الموت ميراد جمّه
ترى اليمن تكرم عن وجيه الانجاس
دار العرب ما حاسها كل رمّه
من دونها سيوفٍ كما حد الامواس
الشعب وافي والحكومه تهمّه