الشعر فكرة

لا ياحمد والشعر قاف وطواريق
واسرار تدفنها البيوت الجميله
والشعر فكره والمثايل توافيق
ولاكل من صاغ المثل يستويله
احدٍ نزل واحدٍ رقى للشواهيق
ينوف عن بعض العلوم الهزيله
واخوك لانامت عيون المخاليق
يجيه مندوب السهر كل ليله
يسهر علي دك الهواجيس والضيق
يضحك ويخفي ضيقته عن قبيله
اجا وسلمى والسروات وطويق
كنه على صدر العمودي يشيله
اغيب في همي عن الناس وافيق
واصحى على خيل الهموم وصهيله
واليوم حملي شايله فوق مااطيق
عايف ولالي بالمقادير حيله
الدرب طّول والتعب نشّف الريق
وانا على الغايه عدمت الوسيله
مابين غلطات الزمن والمطافيق
خذيت من كبوات غيري دليله
اتعب علي عرف الرجال المطاليق
اهل الوفا من كل بد وقبيله
اهل الادب والدين واهل المواثيق
اللي مشت بالعدل عن كل ميله
والا الردي لو يقرن الضحك تصفيق
مذموم بلسان الوفا والفضيله
ناس خذت علمه على غير توثيق
تكذب وتلقى له صدى من عميله
اللي تبيع الهرج جمله وتفريق
محصولهم علم الندم والفشيله
لقو لهم سوق وتجاره وتصديق
اهل النمايم جعل ربي يزيله
والوقت يمضي في مسايل وتحقيق
نركض ورى طرد السراب ونخيله
وانا عيوني تذرف الدمع وتريق
جرح الهوى مايتركه في سبيله
عامين من صار اللقا والتفاريق
علمي بها قفّت شمالٍ مشيله
غندورةٍ حبه جرى بالمعاليق
بنت الرجال اللي تزّبن دخيله
من بعدها بيبان قلبي مغاليق
والحظ خان الجهد وانهد حيله
يلوق لي وصفه بالاشعار وتليق
اليا طرتلي غرته والجديله
له مبسمٍ يغني عن المي ماذيق
وبعيونها حرب البسوس الطويله
في طلته شمس الضحى والمشاريق
وفي خصرها عود القصب ينتميله
كنه من الماضي على العاشق تويق
ويثور بركانه ويقدح فتيله
حبه حقيقه دون كذبٍ وتلفيق
ياليت ضميانه شرب سلسبيله
بس الهوى دايم عذاب العشاشيق
يرميك في كف الظروف البخيله
وانا على عهد الوفا والمواثيق
لو انها صارت علي مستحيله
قلت اتعلل في جديد الطواريق
والشعر فكره والبقا للجزيله