«الحزن باقي..»

حالي عقب فرقاه ياصاحبي حالي
الحزن باقي والهواجس مقيمه
لي صاحبٍ روح ولا دز مرسال
يالله تجينا بالعواقب سليمه
من سبته جربت انا اليوم موال
جر الربابة للحون القديمه
حسبي عليه ان كان روح ولا قال
ولا حسب للقلب قدرٍ وقيمه
وحسبي على بعض العرب خص الانذال
اهل الحسد واهل الردا والنميمه
اللي فعايلهم على قطع الاصال
وقلوبهم سودا ولاهي سليمه
لكن قولوا باقي الحب مازال
وان الوفا بقلوب ناسٍ حشيمه
وقولوله انه دايم الدوم فالبال
ومكانته بالقلب والله عظيمه
وقولوله ان الصبر عندي ولو طال
بصبر ولو تبقى جروحه اليمه