الأطلال

سرقت هذا الليل وأغمضت عيني
ومديت كفي للسحاب وحضنته
أغرق مع سير الكواكب وفيني
كلام يرهق هالضمير وكتمته
كني اشوف الليل لجلي حزيني
والصبح مهما خان بالروح صنته
يا ما حضنت النور بكلتا يديني
وياما لقيت بدربي اللي فقدته
صرخت لين الصوت عيا يبيني
وسكتْ لين الصمت مات ودفنته
اشره على الأحلام والا سنيني
والا اتجرد من زمان سكنته
اشاهد الدنيا يسار ويميني
وأصد عنها من حضورٍ عدمته
مدري متى الأيام تفهم كنيني
والا الزمان اللي بحزني دهنته
أراقب الأطلال والراحليني
وأقول قلبي للزمن ما رهنته
يا ليل حل أرجوك لا تبتليني
صدري حزين وخاطري كم سجنته