السعادة

ابدى بذكر اللي هزم كلّ الأحزاب
ربّ البشر ما خاب منهو لجابه
هو الملاذ ان سكّرت كل الأبواب
وهو الذي دايم جزيل ٍ ثوابه
يغفر ذنوب العبد لا جاه توّاب
من قبل يركز فوق قبره نصابه
الله خلق جنّه ونار ٍ معَ حساب
وكلّ ٍ عطاه الله بحسب اكتسابه
بعض البشر يكسيه من سندس اثواب
والبعض الآخر يحترق بانتحابه
واعلى السعادة؟ شوف ربّي بلا حجاب
في جنّة الفردوس ومعك القرابه
ومحمد المختار قربك والأصحاب
وأنا اشهد أن الدين عزّ ومهابه
يا رب تسقينا من الحوض بأكواب
لا ذاقه الضامي سلم من صوابه
كذا ورد بالنص في وسط الْكتاب
ما يشربه غير اللّي يتبع كتابه
ونشرب من الكوثر بلا همّ وعتاب
وننسى المآسي كلّها والكآبه
ونقطف من اثمار الشّجر كل ما طاب
على سرير ٍ من ذهب ونهنابه
ونسعد بحور العين تلعات الأرقاب
يوم الرجل يرجع بكامل شبابه
وسوق ٍ على ما تشتهي النفس جذّاب
معَ الكريم اللي عزيز ٍ جنابه
يا ربّ ياللي للمخاليق وهّاب
ارشدني لدرب الهدى والأنابه
ويا ربّ نجّ النفس لا صابها عجاب
بدنيا دنيّه ما تساوي ذبابه
قولوا معي امين يا اصحاب واحباب
يالله عسى تصدف بساعة اجابه
تمّ الكلام اللي ذكرناه لأسباب
والله يكافينا سبايب عذابه
وصلوا عدد ما بان نجم ٍ وما غاب
على النّبي واعداد وبل السحابه