أشغلتني بتماديك

خلاص مليتك ومليت طاريك
وحتى خيالك من وجودي محيته
عافك خفوقٍ بالمودة مصافيك
وانهى معك قصة غرامٍ بديته
قضيت منك ولابقى غير ماضيك
أتعبتني لين المفارق نويته
ماني تراني لعبة بين أياديك
وش في غرامك من نعيمٍ لقيته ؟!
غير الشقى ودموع عينٍ تراعيك
هذي نتيجه للوفا اللي عطيته
تحرمني الفرحه ولا يمكن أجفيك
وش ذنبي اللي في حياتي جنيته
رضيت تعذيبك ونفسي اداريك
وخسارةٍ مثلك بروحي فديته
بانت مع الايام وش هي خوافيك
وصدمتني بأسلوب لا ما هقيته
ياللأسف اشغلتني بتماديك
ادمح خطاك وخاطري ما رعيته
دام التصنع والردى ميزةٍ فيك
لازم اهد اللي من أجلك بنيته
وأبي اعترف لك واقسم اليوم مابيك
ملامحك ذكراك شخصك نسيته
لاعاد تعنيني ولاعاد انا أعنيك
وهذا القرار اللي لذاتي خذيته
أعز نفسي عنك لا يمكن أرجيك
وإن حن لك قلبي رفضت وعصيته