ماكان عابر

جتني تقول الحب جاني على الكيف
مع واحدٍ أفنى حياته عشاني!
وراحت عبث تستدرج اوصاف وتضيف:
“مدري وش اللي في غرامه بلاني”
حكيّه يجيني دوم من غير تكليف
إحساسي في قربه (يسابق زماني)..!
ما كان عابر في ضلوعي كما طيف
كان الضلوع و كل نبض المحاني!
في حكيها “صورة غدر” ما بعد شيف
في عشقها راحت تعيد الثواني..!
حتى وصل اسمك سقط سهوًا (مخيف)
بعيون شرهاتي و كف المعاني!
يا صاحبي و إن قلت بالوضع ذا زيف
ما يكذب إحساس ٍ ل غدرك دعاني!
هذا المسا و الجرح خلاني أعيف
طيبة خفوق ٍ ما تجمّل ب (أماني)..!
تبغى الحقيقة طعنتك جات تخفيف
لذنوب عشق ٍ ما يعرفك أناني..!
يالله عساها تقاسمك “كذب ٍ و حيف”
وتذوق وش يعني تخون ../ الأماني..!
لا يكسرك دمعي يا بو قلب ٍ رهيف
للدمع في عيني ملامح / أغاني..!
يسعد مسا جرحك إلى صار ع الكيف
آنست به روحي و عطّر كياني!