نجمة الصبح

مادامني في عمق بحر السهر عمت
ماعاد به حاجه لظبط المنبّه
والله لتطلع نجمة الصبح مانمت
دله تركب لي وفنجال أصبّه
عامين ماعتبت فيها ولا لمت
من كان له فالقلب منصب وقبّه
اللي بلغ معه اهتمامي ليا قمت
من نومي اشيّك على واتس ابّه
مقفي وانا سلمت والا ماسلمت
عادي واموره كلها مستتبّه
هذا علاجه عندي الصد والصمت
عن شرح تقصيره ومدحه وسبّه
هذا القرار اللي ماظني تندمت
على اتخاذه بعد قلبي تنبّه
غلطه لكن منها فهمت وتعلمت
أهدي السرعه ولا آكل مطبّه
جاملت حتى شفتها وصلت الشمت
من واحدٍ ماارتحت له لاجل أحبه
جاملت كم مرّه واخيراً تكلمت
مايذبح الرجال غير التشبّه.