عتاب

قفتك الهجوس وقافك اليوم من نوعه
لو إن ضيقة الخاطر يقفي بها الهنداب
ماشفت البيوت بحبر الأحزان مطبوعه
خلقنا وحنا نسمع إن الزمن غلاب
ولكن بيبطي ما مشينا على طوعه
نبين ونعين وللجمايل نحث ركاب
ونهر الوفا والطيب ماجف ينبوعه
وأنا كل ماشفت إن ظروف الليال صعاب
أكابر على التنهيد والضيق واللوعه
وعلى كثر ماجاريت بعض العباد حساب
مجاراتهم من راحه البال مدفوعه
يقول المثل ماضاع حقٍ وله طلاب
يصح الصحيح وزمرة الشر مردوعه
معي للمعادي كية وللرفيق عتاب
وعلاقات تنعاد وعلاقات مقطوعه
يجوز أتجاوز عن خطا خيرة الاصحاب
لاحيث الجميل وشجرة العفو مزروعه
لكن ديني ودين المعادي بدون أسباب
ليا شاف ناجح في الزمن هلت دموعه
وقريب النظر وقليّل العرف والكذاب
ثلاثة عليهم كلمه الحق مرفوعه
حقايق ومن يعبد وجيه الأوادم خاب
وبه ناس تباعه وبه ناس متبوعه
لاتفرض علينا يازمن غلطة الكتّاب
نجامل وضحكتنا من العام مصنوعه
تبينا نصدق كل من قام في المحراب
وناثق بشخصن والثقه منه منزوعه
كفاية.... وتحنى للكلام الصحيح رقاب
ويصرف دوا روسٍ من العام مصدوعه
لامن الشجر ماطاب شكره على الحطاب
ويحطب من فروعه ويجتث من قوعه
تعجب من اللي كان عنده من أول ناب
يبي الصيد وأنيابه من العام مقلوعه
ياحادي المطايا الجرب دون الخبوت هضاب
لايرشدك ناسٍ من هوا الصيف مفزوعه
لاتضحك عليك أهل الحكي دوّر المجناب
على ويش نحسد جايعٍ ذابحه جوعه
يدور الكلام وتنفتح للدعاوي باب
وكلن معه رايٍ مؤيد لمشروعه
والأنذال مجموعة تكون شلل وأحزاب
ولاحكّ عودٍ عود ماهي بمجموعه
لها أصوات مسموعة ليامن كلٍ غاب
ولامن كلٍ بان ماهي بمسموعه
يعيش الغلا والكره ماعاشت الأنساب
ويهيم المحب وصاحبه يعشق طبوعه
ولكن لاحلّ الكره في ديرة الأحباب
قولوا للمحب يحب تالي الزمن كوعه
الشاعر -علي بن نايف الغامدي