يبحثون الخفا

كل ما قلت ابا اظن العيون تغفى
جنّب النوم كنه ما يبا اللي يبيه
وكل ما قلت عان الجو كنه صفا
انقلب مثل عج مطارد الخيل فيه
يبحثون الخفا اللي شغلهم في خفا
لا ملاقا وجيه ولا اعتذارٍ وجيه
لا تعرض قفاك الا لهرجة قفا
ولا تنصّى بوجهك غير منصى وجيه
الرتب والمناصب ما تعز ضعفا
كم ضعيفٍ توهق لا له ولا عليه
واحدٍ ما يشق ليابغى ما رفا
لو يبا ما تبا ما جا على ما تبيه
ماش فالخبت برد اللي ما يبغى الدفا
لا يجي فالخبوت بحرها تشتويه
من يبا البرد يرقى في علو الشفا
ويتلذذ بنسناس الهواء اللي يجيه
لو زمانك على نص التجارب عفا
كل درسٍ يفيد مجرب اللي يليه
لا حدتك الظروف وشفت حظك هفا
لا تماري ضعيف ولا تجاري سفيه
ولا تشح بوفاك الا على من جفا
مثل هالشكل عطه اشكل ولا تحتريه
ولا تجنْب عن اللي قام جنبك وفا
وظهرت خوته قدام لا تنتخيه