كرام الوجيه

لا ما يسد اللزوم وينطح الموجبات
الا كرام الوجيه بطيب وقفاتها
شرواك يا اللي اعلومك كلها كايدات
ذخرٍ لنا من عنا بقعا وصكاتها
يا سيّدي من عمل مثلك بعدة جهات
عرف يحل القضايا واحتمالاتها
فالشرق راسي كما ترسي جبال السراة
تحتار منّك هل الحيلة وحيلاتها
المنصب اللي تديره يا حميد الصفات
عليه نهضة وطنّا وامتيازاتها
ما يستلم منصبك إلا الرجال الثقات
اللي بعيدة خطاويها وهقواتها
محنّك بالسياسة تلمح المقبلات
من قبل تكتب وتقرا في سجلاتها
فيْ سنينك الحاضرة وسنينك الماضيات
اثبت للدولة انك من قياداتها
لأن يا سعود فيك من المحنّك سمات
نايف عليه الشعوب تجر ويلاتها
النايف الحاكم العادل وثيق الصلات
الحاكم اللي يحقق مستحيلاتها
وجدك معزي موحّدها على المسرجات
وعلى ظهور الأصايل لملم اشتاتها
مغازي الفيصلي تهتال منها الرواة
أقوى رجال العروبة وأكبر دهاتها
خمسين عام على كيد وحروب العداة
يزود عزمه على الأزمة وشداتها
فتح له الله بيبان قبل مغلقات
وجت له وفود الدول تبني علاقاتها
وانتم هل الجاه وأهل الفضل والمكرمات
دروعنا اللي نخليها لحزاتها
وأنا لكم كل ما طقت حصاة حصاة
من عهد الاجداد ونوصي على وصاتها