كف سلمان

خذها على صابرك من كف سلمان
ضربة عطب ما عاد منها سلامه
ما جاك يالحوثي جزاء كل خوان
بالخمس ياخذ فوق خدّه علامه
جرب غضبنا واشرب الكاس مليان
قمنا وقومنا عليك القيامه
العاصفة هبت ومفعولها بان
صانت هوية واستعادت كرامه
ماينفعك صالح ولا تنفع ايران
والله ما تفرح بحكم (الإمامه)
عود على صعده وعود لمران
واقعد وراسك مثل راس النعامه
واشرب من الحسرة مراره وخسران
واحصد ندمك ولالك إلا الندامه
خل الشجاعة .. جاك بالجو شجعان
صقورنا اللي ماعليهم ملامه
لبوا ندا الجيران باخلاص جيران
وغدا لهم فوق السحاب إلتطامه
دكوا حصونك وامتلأ الجو دخان
لين امتلا وجهك غبار وعسامه
جيناك صبح وشفتنا شوف الاعيان
واخذ الحذر لامن رمينا العمامه
حنا الحميّة والمروة والاحسان
وحنا هل الفزعات واهل الشهامه
من طاب طبنا له وزدنا له الشان
ومن جاء لنا بالغدر نكسر عظامه
والحرب حنا سادته سر واعلان
نطبخ قراره وسط قصر اليمامه