طير العنا

نامت عيون الصمت مع صحوه الشوف
وبات الحكي بين الضلوع الصخيفه
من وحشة الواقع ومن سكرة الخوف
صام الكلام ولا لقى له وظيفه
قطّع معاليق الحشا داخل الجوف
والصبر حده كالسيوف الرهيفه
والوقت مع فاله نفض وبره الصوف
وراع الشداد اصبح يعادي رديفه
واليا اضمحل الحظ والحال مكتوف
لا عاد تنشد للخليفه خليفه
ضجه كفوف الياس والبوح معزوف
غنى بها طير العنا مع رفيفه
عانق سما اللوعات والقلب منصوف
ينفض جناحه والمسافه كليفه
مع مدلهم الغبن والقلب ملهوف
يحول دور الحول والهم ضيفه
همه عزاز وفج الاحلام مكلوف
والتيه جوه من ربيعه لصيفه
ورد النيا من بخشه العمر مقطوف
وعرق القدر ينزف ورقته خريفه
والواقع اصبح بين غامض ومعروف
ماعاد لاحداث الحقايق صحيفه
غاب الصواب وجاه رادع وعاصوف
امحى رسومه لو ماهو بكيفه
ونور النهار اصبح من الضيق مكسوف
والليل موحش والمساري مخيفه
واليا غدى العساس والدرب مكشوف
لا تامن الشاوي ليا شال سيفه
كم نية من دونها الشوف مكفوف
تخلج ورى عوج الضلوع العفيفه