تخاريف أبو العريف..!!

@ @ ابو العريف عندي لك خبرية جامدة تسوى مليون ريال؟
بس لاتطلع مثل خبرية الخلطة الروسية كلها فقاعة صابون..!!
@ @ اترك عنك يابو العريف (الخبرية) بتقول ان مهرجان اعتزال ماجد عبدالله سيكون مع مهرجان اعتزال يوسف الثنيان.. أيش رأيك؟
مثل أخبار الصيف اللي نقرأ منها مليونا وخبر واحد فقط يطلع صحيح..!
@ @ صدقني يابو العريف ان هالخبرية 100% ترى الدينا مافيها شيء ما يصير، والحياة حاليا تمثل عصر الاندماجات..
إلا..!!
@ @ المهم يابو العريف ان الدنيا مولعة بين القادسية والاتفاق بسبب عساف العيون، كل سنة هالعادة موجودة، وبعدين يحطوها في الصحافة، من الان فكونا من هالدوشة يا الاداريين، ولا تسوون حالكم، وبعدين تطلعون فيها مثل ابو العريف، وتقولون الصحافة هي اللي ضخمت الموضوع.. والا ايش رأيك يابو العريف.
انت خليت فيها ابو العريف، انت سألت وجاوبت وفصلت، يعني دوري في هالزاوية اصبح اخرطي.
@ @ تعتقد يابو العريف اني ممكن احل مكانك في يوم من الايام؟
الدنيا ماشية كذا، ترى هناك ناس واجد كانوا في الصف الخلفي، وصاروا في الصف الأمامي والعكس صحيح.. لاتستغرب ياولدي كل شيء جائز في هالحياة..!!
@ @ يعني يابو العريف ممكن؟
ممكن ياولدي، ولكن عليك بالخبث والوصولية لأنها الطريق الوحيد في هذا الزمن للوصول الى مثل هذه المراتب.
@ @ يعني انت يابو العريف استخدمت هذا النوع من الخبث والوصولية..!!
صدقني ان زماني مالحق على مثل هذي الانواع، ولكن زمانكم فيه بلاوي، واعتقد ان انك فاهمني زين.