تخاريف "أبو العريف" ..!!

هي الحياة.. هي الدنيا كذا..!!
والله ما فهمت شيء من اللي تقوله، صاير مثل شعراء هالزمن، كذا، وماني، وعلى الطايرن وهذا حكي مايصير..!!
يابو العريف خلك في الشئ اللي يخصك، وخلي الشعر لأهله؟
يا بن الحلال هو فيه احد ماصار شاعر هالايام كل الناس شعراء، حتى انا تراني شاعر والدليل هالبيت اللي ضارب ضرب هالايام في الاسواق (رحت لها قالت ابعد عني.. ابعدت عنها قالت تعال) ايش رأيك في القصيدة، اليست موزونة وفيها دفء واحساس، ودقدقة في قلوب الناس.
والله يابو العريف يجي منك.. عندك اكثر؟
اسمع هذي ترى يتنافس عليها محمد عبده وعبدالمجيد عبدالله وراشد الماجد ومريبط حمد.
ومنهو يطلع مريبط حمد.
واحد من الربع بعدين بتعرفه.
المهم سمعنا القصيدة اللي يتنافس عليها كل المطربين.
قصيدة سهلة فيها مشاعر واحساسيس وصور جمالية واتذكر انني كتبتها في احد مقاهي باريس، وقطع القصيدة هو (يا ناس ذبحوني، وخلوني وحيد، ياناس قتلوني وما عندي جديد، يا ناس تراني صاحي ونايم، واشوف النهار ليل ولاني صائم!! ايش رأيك في المطلع.
حلو جدا جدا جدا، واتوقع ان هالقصيدة تضرب في السوق، لان الناس في هالزمن محتاجة الى (اكشن) فقط في الكلمة، ومو محتاجة الى ابيات طويلة ولغة مش مفهومة.
صدقني انك تصلح ناقد، مثل ما انا شاعر، تصدق ان هناك لغة تناغم وانسجام بيني وبينك.. والا ايه.
والله يابو العريف انت مالك أمان، ممكن اقولك نعم، وتالي تضرب فيني من تحت الحزام؟
يعني هو انا فقط اللي يضرب من تحت الحزام.. ياما وياما ترى ياما وياما اسم مدينة يابانية، وانا لمازرت اليابان حبيت ادخل التراث الياباني في اغاني مطر بينا فكتبت ياما وياما.. وحنا فاما.. نحب ماركة بوما..
ابو العريف.. اشهد انك شاعر تستاهل وسام من الدرجة الاولى.