الأرض غبراء

يالله انّا تحت رحمتك دايم في رجاك
نستغفرك تايبينٍ إليك ومؤمنين
أنت يا رحمن ما هو بنافعنا سواك
يالله انك لا تضحّك علينا الشامتين
يالله انك تشوف الأحوال ما هي بتخفاك
المطر عامين ما أفرح قلوب المتقين
الأرض غبرا موّت القشع من كثر الهلاك
من كثر الامحال ما هي تسر الناظرين
عافوا البدوان الادباش خوفٍ من بلاك
وكلنا عفنا المكاشيت وين نروح وين؟
نرفع كفوف الضراعه لعطفك من عطاك
مارجينا إلا انت يالله ياكرم الأكرمين
حن على أرضك ونتحرى لخيرك من سماك
اسقنا وابعد علينا قنوط المسرفين