خذيت أكثره

وش تكون القصايد كان ماهيب فيك
اعتبرها على صدر الورق ثرثره
مير نفحاتها مع كل نسمه تجيك
تجتمع بك وهي من قبلك مبعثره
المعاني عليّه والتذّوق عليك
واضحه ماعليها بالغموض أدثره
ان لقيتك عيوني بالهدب تحتويك
وان تنحى قدمك اهناك بتبع ثره
فاتكٍ بالجمال ومن يشوفك دريك
تذبح اللي وقف واللي مشى تعثره
انت اظنك تنافس وردةٍ في يديك
تنثر العطر هي وانت الحلا تنثره
تنبلع من حلاك وكل ريقٍ تبيك
والعسل مايجي فالحلق منه أحثره
والحلا بين لفتاتك وضحكتك ذيك
وش بقى للصبايا لاخذيت اكثره