نصيحة مجرب

اكدح ولو أوضاع حالك عديمة
تاخذ مع الأيام بيض الغنايم
استثمر أوقاتك تراها عظيمة
مابين علم وبين بايع وسايم
إن دامت النية بقلبك سليمة
شفت السعد والخير والحظ قايم
خل الحكي وافعل وذب الخريمة
ترى التراخي للنساء والهلايم
تشوف من حالك شتات وهزيمة
إلى ضرى قلبك على الخوف دايم
ما من ورى تدليل نفسك غنيمة
الناس حولك صحصحت وانت نايم
عاند هواك وخل عقلك خصيمه
ترقى بذاتك للحظوظ العظايم
قدامك كبار العواقب وخيمة
يبي لها روس تعصب العمايم
شد الفكر وإحي الصبر والعزيمة
دايم ورى بذل العزايم غنايم