مشاعر خافقي

انا يا بنت من قلبي عشقتك
وانا ما قول لك غير الحقيقه
فؤادي صادقٍ لاحب يخلص
مشاعر خافقي دايم رقيقه
احبك قبل ما شوفك وشفتك
وشب الشوق في صدري حريقه
جمالك غير عن كل الصبايا
بدنيا الحب ما مثلك عشيقه
بوصفك وبحلا شكلك وطولك
ملكتي الزين عن كل الخليقه
بهمساتك بضحكاتك فديتك
سحرتي القلب واخلفتي طريقه
سكنتي به ولاجل رضاك يسعى
ولابه شي بالدنيا يعيقه
تزيد هموم هالدنيا واهوجس
الامن غاب صوتك لو دقيقه
كذا جالس لحالي ماتكلّم
احس بداخلي كتمه وضيقه
انا باصارحك يا بعد عمري
ترى هالكون دونك ما اطيقه
فؤادي في غرامك صار عالق
وروحي في بحر حبك غريقه
احبك.. ايه احبك.. ايه احبك
احبك يا بعد عمري حقيقه
عادل سليمان المخلفي