رجلك وطت ارض الوطن خير وامطار

للدار لمعة وسْطعت لمعة الدار
بك ياسنا الدار العزيز وبريقه
رحت وتحرينا رجوعك على نار
وصدرونا من غيبتك مستضيقة
وضاق الفضا من ضيقة الشعب واحتار
مافيه نفس ٍ حمل بُعدك تطيقه
فعل الحزن من روحتك بالصدر جار
والعين من دمع المفارق غريقة
هم ابتعادك درب / عن الف مشوار
على قلوب الشعب ماطول طريقه
كل النفوس كفوفها ترجي البار
من قلب واحساس ومشاعر رقيقة
تدعي لكم ياسيدي سر واجهار
في كل حين وكل وقت ودقيقة
انه يجيرك من صواديف الاقدار
يامبتغى الحكم السديد وعشيقة
رجلك وطت ارض الوطن خير وامطار
قفر الاراضي فيك صارت حديقة
خبر رجوعك للوطن والصدر سار
استبشرت فيه الصحف والخليقة
حبك ملا هالكون في كل الاقطار
واسس علاقة بالترابط وثيقة
خيرك يابو متعب على كبار وصغار
بنيت لك بالطيب قمة عريقة
محد ٍ لحق عزك ولو صار ماصار
يمناك بالمعروف دايم سبيقة
بذلك مطر بالخير للشعب مدرار
وحجان جودك للمكارم طليقة
حلم القلوب : انك تجي , تنور الدار
واليوم زال الحلم واصبح حقيقة
الله يمد بعمرك اعمار واعمار
ولا يصيبك يا ابيض الوجه ضيقة
فيصل بن سبيّل الباهلي